У чацвер 16 сакавіка ў будынку Міждыяцэзіяльнай вышэйшай духоўнай семінарыі ў Гродне адбылася сустрэча святарскай рады і дэканаў Гродзенскай дыяцэзіі. Узначаліў сустрэчу біскуп Гродзенскі Аляксандр Кашкевіч.

Як паведаміла Прэс-служба Гродзенскай дыяцэзіі, на сустрэчы абмяркоўваліся актуальныя справы мясцовага Касцёла.

Між іншым, удзельнікі абмеркавалі душпастырскую сітуацыю ў святле дыяцэзіяльнай дэмаграфіі і статыстыкі.

Была прадстаўлена інфармацыя на тэму працы Першага Дыяцэзіяльнага Сіноду, завяршэнне якога плануецца гэтай восенню.

Дэканы і ўдзельнікі святарскай рады абмеркавалі тэму будаўніцтва святыняў на тэрыторыі Гродзенскай дыяцэзіі і тое, якім чынам вернікі дыяцэзіі могуць у гэтым дапамагчы.

Таксама прысутныя пазнаёміліся з праграмай адпустовых урачыстасцяў у дыяцэзіяльным санктуарыі Маці Божай Каралевы нашых сем’яў у Тракелях, якія сёлета адбудуцца з 7 па 9 ліпеня, і ўнеслі свае прапановы.

Былі закранутыя і іншыя актуальныя пытанні і справы, звязаныя з развіццём душпастырства ў мясцовым Касцёле і паасобных парафіях.

Сустрэча завяршылася малітвай аб тым, каб прынятыя рашэнні і пастановы садзейнічалі ажыўленню рэлігійнага жыцця ў дыяцэзіі.

паводле catholic.by